OLENTZEROREN MEZUA

Neguko solstizioa edo neguburua hurbil daukagu. Eguzki zaharra akiturik eta indargabeturik dago, laster, 25ean, eguzki berria sortuko da, Eguberri izeneko jai solstizialaren tenorea izanen da. Bezperan, hau da, 24ko gauean, Olentzero Euskal Herriko herri guztietan barrena ibiliko da eguzki berriaren jaiotza iragarriz. Sutondoetan olentzero-enborra piztuko dugu eta subilaroa hasiko da. Hauxe da, festa honen oinarrian dagoena. Gaur egun, sinesmen horretatik deus gutti gelditzen zaigu, tamalez. Kontsumismoa eta materialismoa dira nagusi. Hori dela eta, honako gogoeta egin dut. Piztu ditzagun gure bihotzak eta berreskura ditzagun naturalismoan eta animismoan oinarrituriko arbaso zaharren sinesmenak!

1.- Argaintxabaleta aldean,

Aralarko mendietan,

izar bat ikusi zuten

hango gailurretan.

2.- Ekialdetik zetorren

Kixmi horren berria,

Olentzero zekarkigun,

gure ikazkin zikina.

3.- Jentilak izutu ziren

izarra mintzatzean,

Kixmi bazetorkiela

azaldu zienean.

4.- Olentzero han zegoen,

ikatz txondorra utzita,

aro baten amaiera

zela hura azalduta.

5.- Jentilen azti haundiek,

hori ez ikusi nahian,

trikuharrietan gordetzeko

eman zuten agindua.

6.- Olentzero buru haundia

eta begi gorriak,

zahatoa esku artean

eta pipa ahoan.

7.- Ez zaitezte ikaratu!

-esan zien amultsu-

Ortzi-Mariren aroa

da betiko amaitu.

8.- Bizitza honetan badira

gurpil eta aroak,

garai zaharra da bukatu

berria zaigu agertu.

9.- Euskaldunak oso erne

izan zaitezte beti!

Siniste zaharrak hil dira

ta berriak ageri.

10.- Zeruetako izarrak

mintzo dira goxoki,

Mikelats eta Atarrabi

lurpean dira bizi.

11.- Sorgin zaharrak dira kantuz

bilduta akelarreetan,

Olentzero mozkortia

irrintzika bideetan.

12.- Urtero itzuliko naiz

-dio gure Olentzerok-

horretarako beharko dut

ardo on ta otordu bero.

13.- Euskal Herriko umeak

ditut nik alaituko,

urrak ta intxaurrak banatuz

ta Gabon gaua piztuz.

14.- Ez nauzue aberatsa

ta ez opari-egile,

osasuna ta zoriona

banatzeko naiz zale.

15.- Horra, horra! kanta ezazue

Horra, horra Olentzero!

Atxiki ezazue euskara,

Bizi zaitezte euskaldun!

16.- Agur modura badoa

Olentzeroren mezua

Bizi dadin gure euskara

ta gure Euskal Herria!