Euskal Telebistari so

Perurena edota Retegi noiz agertuko zain,

hokei hobe koprenitzen ziet;

birziklai erabatekoa ekonomikan burutzen,

ilobasoari kontatzen Alduderat gaiten zirenekoak

txokalte eske, zapien xerka, eta kafia, ai ene!, kafia…

Gogoan du astoa Jarolan estekatzen zutelarik,

gogoan soilik askaltzerat agertzen ziren barrideak;

burutik ezin kenduz eraztun salataria

buratsoengandik jaso zuenaz mintzatzeagatik.

Etxeko garbigailu erosi berriari begira

oroitzetatik erreskatatzen lixu kukua,

lixu zurruta, egun atariko apaingarri.

Leihotik dakusan porlan basarmotuak

sortibarreko naturaren hezea lainotzen diolarik

ahulduz, ximelduz, itzaliz doala oharturik.

Amatxirekin baterat, bertze entziklopedia oso bat ere

iraunginen da, enegarrena, 

beharbada, gure historia kamustuaren hondar atal argigarria.

Amatxi maiteak, sorginen ondorengoak,

euskal jakintzaren gordailu,

Geroak zerbait erran diezaigun

zuengandik ikasi behar.