EUSKADIKO FILMATEGIA: UDAZKENEKO EGITARAUA

‘Euskal emakume zinemagileak’ zikloaren bigarren denboraldiak bederatzi film erakutsiko ditu urria eta abendua bitartean

Euskadiko Filmategiak Pedro Olea zuzendaria omenduko du eta ‘El bosque del lobo’ (1970) film luzea eta ‘Zonbi eguna’ (2015) film laburra emango ditu

Euskal emakumezko zuzendarien lanak eta talentua nabarmentzeko asmoz, bederatzi film programatu ditu Euskal Emakume Zinemagile zikloaren bigarren denboraldiak urria eta abendua bitartean. Egileak Gasteizen eta Donostian egingo diren aurkezpenetan egongo dira. Bilboko Arte Ederren Museoko saioak aldi baterako etengo dira, bertan egiten ari diren lanak direla eta.


Zikloa Carmen y Lola (Arantxa Echeverria, 2018) filmarekin hasiko da; egile bilbotarrak Zuzendari Berri Onenaren Goya saria irabazi zuen pelikula ausarta honengatik. Mujeres en pie de guerra (Susana Koska, 2004) eta La higuera de los bastardos (Ana Murugarren, 2017) filmek Espainiako Gerra Zibilerako bidaia proposatuko dute: lehenbizikoak, faxismoaren aurka borrokatzen diren emakumeen testigantzen bidez, eta bigarrenak, berriz, Ramiro Pinillaren La Higuera eleberria abiapuntutzat hartuta.


Ione Hernándezek 1% esquizofrenia (2006) dokumentala aurkeztuko du, gaixotasun mental honen inguruko aurreiritziak ezabatu nahi dituen lana. Era berean, Esther Pérez de Eulatek harreman publikoentzat kaleak agertoki gisa duen balioa aldarrikatzen du Poética Pública PLAZAn (2010).


Etiopiara joango den euskal misiolari baten eta bere alabari etorkizun hobea eskaintzeko Euskal Herrira etorriko den gazte etiopiar baten bizitza paraleloak biltzen ditu Toda la vida del mundo (Nuria Ruiz Cabestany, 2010) lanak. Maru Soloresek ere lehen haurtzaroari eta, batez ere, amatasunari erreparatzen dio Aztarnak filmean (2021).


Bestalde, Andereak film luzeak (Yolanda Mazkiaran, 2020) Mariren pertsonaia mitologikoari buruzko galderak egiten ditu orainetik. Amaia ETA Aitor Merino anaiek Asier ETA biok (2013) filmean adiskidetasun baten istorioa dokumentatu dute.


Azkenik, eskolako-saioetan Lucius Dumben berebiziko bidaia (Maite Ruiz de Austri, 2013) proiektatuko da, zientzia fikzioaren bidez giza eskubideen aldeko apustu sendoa egiten duen animaziozko pelikula.

Pedro Oleari eskainitako saio berezia 

Euskadiko Filmategiak Pedro Olea, euskal zinematografiaren oinarrizko zuzendaria, omenduko du azaroaren hasieran, Gasteizen, Donostian eta Bilbon egingo diren emanaldi berezi batzuekin. Egileak El bosque del lobo (1970) film klasikoa aurkeztuko du Tabakaleran eta Bilboko Arte Ederretako Museoan, beldurrezko zinemarekiko gustua erakusten duen filma. Gainera, Zonbi eguna (2015), Olearen film labur dibertigarria, emango dute. Autorearen lanak kemenak, jakin-minak eta dinamika sozial makurrek zanpatutako pertsonaien ohiko erretratuak zeharkatzen dituzte.

Egitaraua