A PORTALADA EDUCATIVA ARASAAC

A PORTALADA EDUCATIVA ARASAAC DISPOSA YA D’A SUYA VERSIÓN EN ARAGONÉS

A portalada educativa ARASAAC, implementata y finanziata por o Departamento d’Educazión Cultura y Esporte d’o Gubierno d’Aragón y coordinata por a Direzión Cheneral d’Innovazión y Formazión Profesional de dito departamento disposa ya d’a suya versión en aragonés.

ARASAAC ye un Sistema Aumentativo y Alternativo de Comunicazión (SAAC) basato en l’uso de pictogramas que fazilitan a comunicazión a las personas que tienen dificultaz en iste ambito por diferens fautors (diversidat funzional, esconoximiento de l’idioma, traumatismos y dechenerazión cognitiva).

A realidat trilingüe d’Aragón nos empenta a fer fren a la mesma dende toz os ambitos. A ferramienta d’ARASAAC, traduzita a más de trenta luengas, no podeba dar a espalda a iste feito, y a suya versión en aragonés eba d’estar presén. A plegata contina d’alumnalla inmigrán en as diferens etapas educativas, y en as diferens zonas lingüisticas d’a comunidat, requiere a implementazión de toz os recursos esistens.

Dende a Direzión Cheneral de Politica Lingüistica s’ha feito o esfuerzo d’adautar y traduzir os contenitos d’a portalada ta meter-los a la disposizión d’educadors y alumnalla.

A comunicazión y o parlache son esenzials ta tot ser umán, ta relazionar-se con os de demás, ta aprender, ta desfrutar y ta partizipar en a soziedat y uei en diya, grazias a istos sistemas, no han de veyer-se frenatos a causa d’as dificultaz en o parlache oral. Por ista razón, totas as personas, ya sían ninos, chovens, adultos u viellos, que por cualsequier causa no han alquirito u han perdito un libel de fabla sufizién ta comunicar-sen de traza satisfactoria, amenestan emplegar un SAAC.

Arasaac conta con una colezión de más de 10.000 pictogramas. O equipo d’ARASAAC y a suya comunidat de colaboradors creya y adauta materials ta la comunicazión y l’azesibilidat cognitiva a partir d’a colezión de pictogramas d’ARASAAC.

Joaquín Ezpeleta ye considerato o suyo creyador. Grazias a la colaborazión que s’inizió con o Zentro Politeunico Superior (ZPS) d’a Universidat de Zaragoza y o ZPEE Alborada, una alunna adautó un zorz virtual creyato ta o suyo proyeuto fin de cursa y a partir d’astí, en 2007, se creyó ARASAAC.

https://arasaac.org/?msclkid=6af93bd8b59d11ec929f8ea317e36334