FRANCHO NAGORE, GUALARDONAU CON O PREMIO OSTANA 2022
– ESCRITURAS EN LUENGA MATERNA – ESCRITURAS EN LENGA MAIRE
Entre o maitín de uei, en a sala de prensa d’o Paraninfo d’a Universidat de Zaragoza, ha teniu puesto a rueda de prensa en a cuala s’ha informau d’a conzesión d’o Premio Ostana 2022 / Scritture in Lingua Mai / escrituras en lenga maire, a l’investigador d’a Universidat de Zaragoza Francho Nagore.
O gualardón, que alcanza ya a suya XIV edizión, s’entregará en Ostana (Italia) entre os diyas 24 y 26 de chunio, de par d’a trobada d’autors en luengas maternas de tot o mundo que cada año se leva a cabo en dita localidat italiana, en a fiesta en favor d’a biodiversidat lingüistica.
En a presén edizión, consonando con o 40 cabo d’año d’o Estatuto Aragonés, a luenga aragonesa prenerá espezial protagonismo con a reconoxenzia a la labor dozén y investigadera de Francho Nagore.
Entre l’auto, Nuria Mignone Cirugeda, representán d’a organizazión Premio Ostana, ha reivindicau a importanzia sozial d’a existenzia de luengas como l’aragonés, o suyo papel de difusor cultural y a suya contrebuzión a l’enriquimiento d’o patrimonio cultural inmaterial.
Por a suya parti, Francho Nagore s’ha amostrau agradexiu por a reconoxenzia y ha apostau por fomentar a conzenziazión d’os fablans sobre a suya propia luenga y por afrontar as grans roncas que se visionan en l’orizón en ista materia, instando a fablans, meyos de comunicazión y esferens alministrazions a unir esfuerzos.
A la suya vez, José Ignacio López Susín, direutor cheneral de Politica Lingüistica d’o Gubierno d’Aragón, ha agradexiu a la organizazión d’o Premio Ostana a eslezión de l’aragonés como protagonista en ista edizión, ha aponderau a eslezión de Francho Nagore como premiau y ha espresau a nezesidat de continar luitando por a pervivenzia y o desembolique d’as luengas que se fablan en Aragón.