III CONCURSO ANTONIO ARTERO DE VIDIO EN ARAGONÉS

O GUBIERNO D’ARAGÓN CONVOCA O III CONCURSO ANTONIO ARTERO DE VIDIO EN ARAGONÉS

O Boletín Ofizial d’Aragón publicó a convocatoria d’o III Concurso Antonio Artero que premia una obra de vidio locutada u soztitolada en luenga aragonesa, con un premio de 1000 euros.

As obras que concorran a iste premio abrán d’estar orichinals y ineditas, sin siña ni siñal beluna que indique a suya prozedenzia y no aber estau premiadas con anterioridat ni aber-se presentau a garra atro zertamen cual fallo aiga de produzir-se antes d’a resoluzión d’o III Concurso Antonio Artero de vidio en luenga aragonesa.

Os formatos de fichero almitius serán MOV, MP4, MKV, AVI, WMV, FLV. A gravazión será en orizontal en formato estandard de vidio, no azeutando-se vidios gravaus en vertical.

A tematica d’as obras ye libre y podrán presentar-se treballos de tota mena de cheneros y narrativas zinematograficas: o documental, a fizión, as series (sit-com), l’animazión, etz.

Podrá utilizar-se cualsequier meyo de gravazión: vidiocamara, cambra fotografica dichital, tablet, móbil, ipad… podendo, si se deseya, editar-se con ferramientas esternas.

As obras se presentarán baxo lema y seudonimo y s’achuntarán en una memoria USB, con un masimo de zinco vidios por persona.

O plazo de presentazión de demandas ta iste concurso que organiza o Departamento d’Educazión, Cultura y Esporte, a traviés d’a Direzión Cheneral de Politica Lingüistica, será de 15 diyas abils a contar dende o diya siguién a o d’a publicazión d’a convocatoria en o BOA.

As demandas s’endrezarán ta la Direzión Cheneral de Politica Lingüistica, presentando-se eleutronicamén a traviés d’o Rechistro Eleutronico d’Aragón conforme a o modelo espezifico que se troba disponible en a siede eleutronica de l’Alministrazión Publica d’a Comunidat Autonoma d’Aragón, azedendo a traviés d’a direzión eleutronica: https://www.aragon.es/tramitador/-/tramite/concurso-antonio-artero/concurso-antonio-artero-2022

O concurso pilla o nombre d’Antonio Artero, direutor de zine naxiu de Zaragoza en 1936, autor de multiples documentals y zintas como Doña Rosita la soltera, El tesoro del capitán Tornado, Trágala perro, Cartas desde Huesca o Monegros , entre atras. Amás, estió o primer direutor que rodó una obra en aragonés: Pleito a o Sol, un pasaje de la vida de Pedro Saputo, novela d’o escritor Braulio Foz cuala primera edizión ye de 1844, que ha teniu un gran esito en Aragón, y con gran influenzia en autors posteriors, espezialmén en Ramón J. Sender.

Vidio:

https://www.youtube.com/watch?v=-HSX_yHuRmM