NUPeko ikertzaile bati nazioarteko saria eman diote ingeniaritza biomedikoan material bat erabiltzeari buruz egin duen lanagatik
Adrián Claverrek Society of Vacuum Coaters-en (SVC) graduondoko ikasleentzako bigarren saria eskuratu du elkarteak Chicagon egin duen kongresuan
Adrián Claver Alba Nafarroako Unibertsitate Publikoko (NUP) INAMAT2 Institutuko ikertzailea saritu dute Society of Vacuum Coaters (SVC) elkarteak berriki Chicagon (Estatu Batuak) egin duen urteroko konferentzian. Society of Vacuum Coaters (SVC) irabazi-asmorik gabeko nazioarteko erakunde profesionala da, eta gainazalen estaldurak eta akaberak egiten ditu huts-prozesuen bidez. Entitate hori industriak, mundu akademikoak eta ikerketa-laborategietako profesionalek osatzen dute, eta SVC Graduate Student Award graduondoko ikasleentzako sariketako bigarren saria eman dio ahozko aurkezpen batengatik. Aurkezpenak aztergai du zenbait estalduraren erabilera magnesio-aleazioen degradazioa kontrolatzeko, eta horrek materialaren erabilera areagotzen du gailu biomedikoetan.
Adrián Claverrek Chicagoko konferentzian parte hartu zuen, SVCk estaldurekin lotutako gaietan diharduten ikertzaile gazteei ematen dizkien bederatzi beketako bat eskuratu baitzuen. Beka-programa horren bidez mundu osoko 35 urtetik beherako ikasle eta profesionalentzako bidaia, ostatua eta konferentziako izen-ematea ordaintzen dira, hautatutakoek kongresuan ahozko aurkezpen teknikoa egin dezaten. Batzorde batek eskaerak ebaluatzen ditu eskatzaileen proiektuaren kalitatean eta garrantzian oinarrituta. NUPeko ikertzailearen kasuan, bai bere doktoretza-tesian[1] bai oraingo ikerketan (aplikazio biomedikoetan magnesio-aleazioak erabiltzeko aukera) egindako lana eta ahozko aurkezpenaren proposamena baloratu zituzten.
Aurkezpenak magnesioa izan zuen aztergai. “Magnesioa modu naturalean dago gure organismoan, eta, beraz, kontzentrazio kontrolatuetan ez du toxikotasun-arazorik sortzen”, Adrian Claverren iritzian. Horri beste ezaugarri batzuk gehitzen zaizkio, hala nola arintasuna eta giza hezurrarekin duen antzekotasun mekanikoa. “Hori dela eta, aukera ezin hobea da torloju, finkapen, grapa eta traumatologian eta, oro har, ingeniaritza biomedikoan erabiltzen diren beste elementu batzuetarako”, gehitu du.
Magnesio-aleazioen degradazioaren aurka
Adrian Claverren ikerketaren ardatza da medikuntzan magnesio-aleazioak erabiltzeko oztopo nagusietako bat gainditzea: bere degradazio azkarra. Izan ere, korrosioa izateko arriskuak mugatu egin du material hori gailu medikoetan aplikatzea.
Chicagoko konferentzian, NUPeko ikertzaileak higadurarekiko erresistentzia eta gogortasuna duten bi material moldakorren erabilera aurkeztu zuen, titanio nitruroa (TiN) eta titanio-silizioa (TiSi), zeinek magnesio aleazioen gainean hainbat geruza osatuz aplikatuta azken horren degradazioa kontrolatzen baitute. Geruzak NUPeko PVD ekipo berriarekin jarri ziren (lurrun faseko deposizio fisikoa, ingelesezko sigletan), eta Adrian Claverrek gidatu zuen abian jartzea.
Konferentziak TechCon (Technical Conference) zuen izena, eta estalduren arloan munduan egiten direnen artean garrantzitsuenetako bat da. Aurtengo edizioak, 67.ak, mundu osoko milako bat lagun bildu zituen. Ekitaldian ehun bat aurkezpen tekniko egin ziren, erakusketa komertzial bat, nazioarteko beste ehun bat enpresa bildu zituena, eta hainbat jarduera, hala nola forumak, bilerak edo ekitaldi sozialak, esaterako, atletismo-lasterketa bat. Hirurogeita hamar lagunek hartu zuten parte bost kilometroko lasterketan, eta Adrián Claver izan zen irabazlea.
Argazkia:
Adrián Claver, Chicagoko konferentzian egin zuen aurkezpenean.
[1] https://www.unavarra.es/eu/sites/actualidad/contents/noticias/2024/05/16/tesis-recubrimientos-biomedicos.html